الاثنين، 15 فبراير 2010

الجبل


ياااه لو يرجع بيا الزمن وياخدنى ابويا فى حضنه


أضحك وأبكى أفرح وأجرى ولحضنى اضمه


ولا حس بالجبل اللى فوق كتافى حمله زايد


ولا ييجى عليا اليوم وأفكر فى بكرا وهمه

هناك 48 تعليقًا:

أحمد عبد الحميد يقول...

حلوة قوى وحاسسها قوى قوى
لو أى حد والده عايش يجرى ويترمى فى حضنه ومايتكسفش ويحس إنه كبير ولو والده توفاه الله لا ينساه بالدعاء ويكثر وهب الصدقات له

محمد فؤاد (صاحب عمود النور) يقول...

ابوحميد..

ميرسى على كلامك الجميل
انا والدى الحمد لله عايش بس هو احساس الطفوله الجميل الواحد افتقده لما كبر واقصد هنا انه شال اهم فاهمنى؟

لــــ زهــــــراء ــــولا يقول...

محمد
مش عارفه ارد على كلامك
الدموع مغرقه الكيبورد
الله يكرمك يا فنان
اكيد لازم ارجع ارد من تانى


زهراء

صبرني يارب يقول...

هو الحكايه اصلها مش تلاقي الحضن

الحكايه انك ما هاترجع تاني بدون هموم

هاتشيل يعنى هاتشيل يا ولدي

بس حضن الاب بيقوي بيطمن

ربنا يما حرمنا منه ان شاء الله

تمام الكلام يا باشا

فاتيما يقول...

آه يا محمد

يا صاحب اجمل ضى

حلوة قوى و هتلاقى الف حد يدخل و يفتكر بيها جبال همومه و اللى كان شايلها عنه و ساكت

تسلم ايدك

لــــ زهــــــراء ــــولا يقول...

محمد
-*-*
رجعت لك من تانى علشان اعلق على البوست
نبدأ على بركة الله

ياااه لو يرجع بيا الزمن وياخدنى ابويا فى حضنه





اول حاجه كلمة ياااااااه تم تكرار فيها حرف الالف دليل على قسوة الالم والاحساس به الالم عميق بشكل كبير جدا

اما بقى كلمة بيا فيها خصوصيه يعنى عاوز الزمن يرجع بيك لوحدك مش شرط والدك يرجع سنه صغير تانى زى ايام ما كنت انت طفل اهم حاجه انك تترمى فى حضنه وتحس معاه بالامان والراحه


"أضحك وأبكى أفرح وأجرى ولحضنى اضمه"




انت عاوز تمارس حياتك بشكل طبيعى يعنى تضحك وتجرى وتلعب بس فى الاخر ترجع تانى لحضنه اللى هو الملاذ الاخير لك ويمكن حضنه يكون اجمل مكان فى الدنيا وتشوف العالم من خلاله ....



"ولا حس بالجبل اللى فوق كتافى حمله زايد"


كلمة الجبل رغم انها كلمه قاسيه جدا جدا لكن هى فى الاخر عباره عن حبات رمل فوق بعضها يعنى الهموم دى ممكن تكون حاجات صغيره اوى بس من كتر التراكمات عمل منها جبل ....


"ولا ييجى عليا اليوم وأفكر فى بكرا وهمه"


وانت فى حضنه مش بتفكر فى اى حاجه لا بكره ولا بعده ولا ازاى ولا ليه
كل اللى يهمك انك فى حضنه وبس ...

----------------

فنان بجد يا محمد
بس تعبتنى جدا جدا لانى تذكرت والدى الله يرحمه واشتقت فعلا لحضنه


زهراء

Unknown يقول...

الزمن لا يرجع للخلف او يتوقف لكن يجب الا نكف ان التمنى

hend mossallam يقول...

gamda a5er 7aga 2l 27ssas 2lii fiha byewsal besor3a awii bgd bgd 2nta gamed giidan ...w ana msh 3arfa akteb 2h :D:D bas hya 3agbanii gidan

Tamer Nabil Moussa يقول...

كلنا بنحلم بكدة نرجع صغار ونرتاح من كل حاجة طلعت بينا لما كبرنا

بس هى كدة الحياة مراحل

ربنا يوفقك ويكرمك

مع خالص تحياتى

Mano يقول...

فعلا
ميشلش همك والجبال اللي فوق كتفك الا ابوك
تسلم ايديك
ولسه بدري علي ديوانك سجارة فرط ولا ايه انا مستنيه
تحياتي

أمل حمدي يقول...

يااااااه يامحمد

ياريت

قل للزمان ارجع يا زمان

خواطر شابة يقول...

أنا فقدت والدي من سنين فحاسة أوي معنى كلامك والاه اللي ابتديت بها الجملة حاساها أوي
اللي والده لسه عايش يقدر انه في نعمة ويصونها ويحافظ عليها
تحياتي

الشعب لابد له من حكومه تشكمه يقول...

##ولا حس بالجبل اللى فوق كتافى حمله زايد


ولا ييجى عليا اليوم وأفكر فى بكرا وهمه##


كلنا هذا الرجل,نتمنى كلنا نرجع صغيرين كان الواحد اللى شاغل باله ياترى بابا وهو راجع هيجيب مصاصه ولا شيكولا؟؟؟؟؟؟
زى ما انت قلت لا بتفكر فى بكره وهمه.

حلوه اوى يامحمد وتتحس.

عاشقه الرومانسيه يقول...

انا بقى حاسه كلامك قوى
لان بابا متوفى

ربنا يبارك لك فى باباك ويخليهولك يامحمد
(:

ستيتة يقول...

تصقيف حاااااااااااااااااااااد

حلوة بجد

mohamed ghalia يقول...

بسيطة انسى بكرة وهمه
ربنا يسعدك دايماااا

SHAPE YOUR LIFE (ABOALI) يقول...

تؤتؤ
حضن ابويا ده حضن بدون قياس
كفاية قربة منى ونبضات كلها احساس
نصحية هنا خبرة ببلاش
ضياء نور ايده مع ايدى وعمرى ماهحتاس



جمييييييييييييل جدا المعنى اللى رسمته فى صفحة رسم الحنين الى حضن الدفء حضن الاب والاسرة

وفعلا البراءة والعودة اليها هى طريق للنجاح

تحياتى العميقة

هناء محمود يقول...

بجد قولت الكلام إللى كلنا كان نفسنا نقوله وحاسينه .. بكلمات بسيطة وسهلة وعادية .. هو ده بجد إللى اسمه السهل الممتنع

ما شاء الله عليك

صيدلانيه طالعه نازله يقول...

انا نفسى قوى فى الضمه دى
وحشتنى قوى
بعد المكان مقيدنى
و كسوفى انى ابوح خانقنى

نفسى قوى ارجع لحضن ماما و بابا تانى و اكون من تانى عروستهم الصغيره اللى بيلعبوا معاها و يحنوا عليها

اصل انا من ساعه ما سبتهم و الدنيا هيا اللى بتلعب بيا

ليه يا محمد فتحت السيره دى
ربنا يسامحك

Baskouta يقول...

جميلة اوي يا محمد كلماتك
احساسها واصل للقلب

عارف حضن الام والاب بيخفف فعلا الحمول الكتير اللى شايلنها
زمان واحنا صغيرين كنا نحضنهم عارفين انهم هيشيلوا عننا اي حمل
اما دلوقت فالحضن بتاعم مجرد مسكن
حلو وجميل
بس منقدرش نشيلهم همومنا اللى بجد مفيش حد غيرنا يقدر عليها

تحياتي البسكوتية

محمد فؤاد (صاحب عمود النور) يقول...

زهراء...

انا اسف انى خليتك تعيطى انا مش قصدى
والله يرحم اموتنا جميعا

ايه النقد الرائع دا تسلم ايديكى
ــــــــــــــــــــــــــــــــــ

صبرنى يارب....

بالظبط هو دا المعنى اللى اقصده واللى اعتقد انه وصل لمعظم الناس

محمد فؤاد (صاحب عمود النور) يقول...

قاتيما...

هموم وجبال واحمال ماحناش قدها بس الحمد لله على كل شئ

يا صاحب اجمل ضى
ميرسى قوووى على التعبير الجميل دا
ودايما منورانى

ـــــــــــــــــــــــــــــــــــ

العيسوى الصغير...

مهو انا عارف انه مش هيرجع للخلف بس عمرى ماهقدر ابطل اتمنى لان التمنى بدايه الانجاز

نورتنى

محمد فؤاد (صاحب عمود النور) يقول...

I'm The CraZy One....

ولا تكتبى اى حاجه دا كفاية انك بتقريلى اصلا (:

ميرسى يا هند على كلامك الجميل دا
ـــــــــــــــــــــــــــــــــــ

Tamer Nabil...

كنت دايما بقول لامى وانا صغير انا عايز اكبر تقولى ومستعجل ليه وبكرا تتمنى ترجع تبقى صغير تانى
صدقة واللهى

محمد فؤاد (صاحب عمود النور) يقول...

Mano....

وانت صغير ولا كنت حاسس بالجبل اللى شايله ابوك ودلوقتى حسيت
الديوان هياخد وقت شويه بس مش كتير واول لما ينزل اكيد هعلن فى المدونه وميرسى على اهتمامك

ــــــــــــــــــــــــــــــــــ

أمل حمدى...

تفتكرى لو قولت هيرجع؟؟؟

محمد فؤاد (صاحب عمود النور) يقول...

خواطر شابة...

الله يرحم اموتنا واموات المسلمين
انا اسف انى فكرتك بحزن قديم

انا حاسس ان البوست دا قلب مواجع ناس كتير انا اسف

ـــــــــــــــــــــــــــــــــــ

شيما...

على رايك واللهى يا شيما ماكنش فى اى حاجه من الهم دا ولا الاحساس دا كان كل همك انك تنجح وفى الاجازة تلعب بس

محمد فؤاد (صاحب عمود النور) يقول...

عاشقه الرومانسيه ....

ربنا يخليكى ويعوضك كل خير عن فقدان ولدك
بس انا اقصد بالاب هنا رمز
انا مش قولت البوست دا هيقلبها حزن ههههههههههههه

ـــــــــــــــــــــــــــــــــ

ستيته حسب الله الحمش....

وانا انحنى احتراما لتصقيفك يا دكتورة

محمد فؤاد (صاحب عمود النور) يقول...

mohamed ghalia..

تفتكر فى حد يقدر ينسى بكرا ؟؟؟

ـــــــــــــــــــــــــــــــــــ

SHAPE YOUR LIFE (ABOALI)....

كل مرة بتفاجئنى بشعر ترد بيه على كلامى

تسلم افكارك

محمد فؤاد (صاحب عمود النور) يقول...

أم .. بوبه..

ربنا يخليكى يا ام بوبه والحمد لله ان كلامى بيوصل على طول للقلب

ـــــــــــــــــــــــــــــــــــ
صيدلانيه طالعه نازله....

ليه يا محمد فتحت السيره دى
ربنا يسامحك

انا ماقصدش يا دكتورة انى اضايق حد
انا اسف لو كنت ضايقتك

محمد فؤاد (صاحب عمود النور) يقول...

Baskouta...

فعلا يا بسكوته الواحد ماكنش شايل اى هم زمان ...كل يوم بحس انى بكبر سنه مش يوم

منوارانى دايما

قيس بن الملووووح يقول...

المشكلة المعروضه علي مدونتي قد تستفيد منها للمستقبل
زورنا شاركنا الراي الذي قد يفيدنا جمعا

حلمى البعيد يقول...

إزيك يامحمد

إيه ياعم الكلام الجميل ده..ماشاء الله عليك

دايما متقدم وللأحسن يارب

بجد الأب هو مصدر الأمان وهو الانسان الوحيد اللى بنحس بالأمان حتى لو كلمنا بس

ربنا يخليهم لنا يارب

ويباركلنا في عمرهم

تحياااااااااااتى

ENG./ELSAYED,PMP يقول...

جميلة يا فنان
تسلم ايدك

سندريلا يقول...

حلوة اوي اوي اوي
بجد كلامك جميل وشغلك هايل
انا سعيدة اني هتابع شغلك واعمالك الممتازة دي
تسلم ايديك

لــــ زهــــــراء ــــولا يقول...

ياااه لو يرجع بيا الزمن وياخدنى ابويا فى حضنه

هو ممكن الزمن يعمل بلاي باك لورا!! لا طبعاً بس دي اكتر امنية بتتمناه في اللحظة اللي عشت فيها احداث شعرك ..
فيه عندنا في اللغة شئ بيقول فيه ضمير محذوف اي مستتر تقديره هو او هي ....
انت هنا بالمثل فيه امنية مستترة ورا جملتك امنية مستترة مجملها انك ترجع طفل صغير.
عشان شئ واحد ان باباك ياخدك في حضنه طب وايه اللي يمنع لو اخدك في حضنه الان وانت بوضعك ده ؟
لأ انت محتاج تعيش عقل الطفل الصغير
اللي اكبر هم عنده لعبته
واللي ميشيلش هم لدنيته
عارف الانسان لما بيكون في شدة ويجي ينام وبيتخذ وضع الجنين وهو نايم؟.
ده اصدق احساس جايله في الوقت ده انه عايز يهرب من مشكلته بهروب عقله للنوم.. وبيتمنى من جواه لو يرجع جنين
;في بطن امه
لتحتويه برافووووووووو انت جسدتلنا المشهد ده ورا جملتك دي ببراعة
بكلمات جديدة خااااااااالص وجواك تتمنى ده يحصل فعلا لما قررت حرف الالف في ياه زي ما قالت الجميلة زهرة
تعرف لوالاب غير موجود كنا نقول مجرد احساس مش هيتحقق . المشكلة لو الاب موجود بيكون الاحساس اللي وراء تلك الامنية دي طااااااغي قوووي بس للأسف مش هتقدر تواجه بشعورك واحساسك ده عشان ينفذهولك ..صعب انك تنقله رغبتك دي فخلتها محبوسة جواك... بس انت قررت تحققها جواك بالتخيل . وتتخيل لو انك رجعت طفل صغير ممكن تعمل ايه..شريط سينمائي دلوقتي وتعالى ننتقل للبيت التاني لانك افترضت تحقيق امنيتك فيه

"أضحك وأبكى أفرح وأجرى "
براءة الطفل الصغير هتطلع كل اللي جوااااك ولو كانت احاسيس مختلطة ومتباينة وعكس بعضها او احياناً بتكمل بعضها
"ولحضنى اضمه"
هو مين فيكم اللي محتاج حضن التاني اكتر ومين فيكم اللي محتاج ضمة حضن؟
اكيد انت وبالرغم من ذلك انت اللي هتضم باباك في حضنك..عشان في المقابل وردة فعله الطبيعية تجاهك انه يغمرك بفيض من الاحضان
فكرتني بكلمات اغنية اليسا رغم انها محتاجة حبيبها اكتر منه الا انها بتقوله
على باللي حبيبي اغمرك ما اتركك
اســــــــرقـــــــك مـــــــا ارجعك
احبسك ما اطلعك من قلبي ولا يوم
هي اللي هتغمره... هتسرقه...هتحبسه في قلبها - بالرغم من ان هي اللي محتاجة وجوده اكتر
بس هي هتعمل كدة عشان رد الفعل الطبيعي اللي هيقابل فيها مشاعرها دي هتكون
بقلبك تخبينــــي
م الدنيا تحميني
تمحي من سنيني
كل لحظة عشتها قبلك.
انت - الابن - هتضمه في حضنك ومكملتش لان من البديهي ان يتنقلنا المشهد اللي مذكرتوش الاستنتاج من ورا حضنك ليه اللي هو. وهو كمان هيعمل كدة ويخبيني في حضنه
ويمسح الهم عن عقلي وهو بيمرر كفه على شعري وهيلف بيا الكون وهو ضاممني على صدره .

لــــ زهــــــراء ــــولا يقول...

تـــــابـــــــــــــع
هنا هنسألك سؤال انت قريته من قبل ما نسأله
حصلك ايه بعد ما رجعت طفل صغير؟
انت رديت من قبل ما نسأل منعاً للاطالة والمط

ولا حس بالجبل اللى فوق كتافى حمله زايد""
ــــــــــــــــ
"ولا ييجى عليا اليوم وأفكر فى بكرا وهمه"
هنا قررت ترجع تاني للواقع لما اخفقت في الاستمرار في حلم تحقيق امنيتك... ورجع لعقلك تاني الموقف العصيب اللي بسببه اتمنيت انك ترجع طفل صغير
كأنك بتقول يارتني كنت نجحت ارجع تاني طفل ولا اني اعود من جديد لهمي وتفكيري وحزني
ربنا يبعد عنك همك
ويخفف كل الالامك
ويسعــــد قلـــــــبك
ويحققلك كل احلامك
ويبعد عنك شر خلقه
ويسعدك في حياتك


نيجي لتحليل الصورة الابن مع الاب في خط منحني يشبه انحناء الجنين قليلاً .وخط الجسم المنحنى بينقلنا الاحساس بالدفئ والامان . لاحظ ان الاب في ظهر الابن بمعنى اخر ان بصنالها من زاوية اخرى ان الابن قرر يخلي باباه سنده وظهره
يخليه شئ مادي يستند عليه
وحضنه الدافي يغوص فيه
ويغمض عيونه على احلامه
ويسرح في دنيا الهم ميكونش فيه
والضحكة الحلوة وبس تنور حوليه
ماهو بابا حبيبه جمبه يشيل الهم ليه؟

ولله المثل الاعلى لما بنيجي ننام بنام نومة الجنين على جنبنا الايمن ونقول لربنا بسم الله بسمك اللهم وضعت جنبي وفوضت اليك امري والجأت اليك ظهري...
يعني انت يارب سندي وظهري .


تعالي بقى نشوف اللون الابيض اللي لابسة الولد - التي شيرت والقبعة - هو عقله زي اللون مش شايل للدنيا هموم وزي ما القبعة بتحجب الشعر هي كمان حجبت عنه الافكار والهموم.
والبروفل اللي لابسه الاب فيه خطوط عريضة بيضاء يعني بياخد مساحة حرة عن همه وشغله وتفكيرة وبيخلي مساحة في حياته يرجع فيها طفل تاني لما يلعب مع ابنه ويكون معاه

عجباني قوووووي ضمة الاب لابنه بأديه لاتنين خايف يفلته منه بيضمه بحب وحنين حستها قوي ...والضحكة الحلوة على وش الاب استمدها من ضحكة حبيب قلبه ابنه ونور عنيه
مش عارفة بقى يافندم اشكرك على الاحساس الحلو اللي نقلتهونا ولا الابيات الجميلة اللي عيشتنا معاها ولا ع الصورة التحفة .تسلم الايادي يافنان ..ملحوظة على فكرة انا مش اي حد اقوله يافنان.
وانت مش بتاخد من وقتنا لو حاجة متستاهلش مكنتش هعلق واضيع وقتي بس انا هنا مش بضيعه انا بتعلم منك ومن فنك ):)
لــــولا

بوبو يقول...

ياااااااااااه يا محمد.. انا بكيت لما قريت كلامك.. صحيح اربع سطور بس لخصوا كل احساسنا بالاب.. اصل انا والدي متوفي وكتير بتمنى لو كان لسه عايش.. اصله اتوفى وانا ف ثانوية عامة.. كنت يا دوب 17 سنة ولسه برضه مش فاهمة حقائق الحياة كويس.. لو بس الزمن يرجع لورا واقدر اقعد معاه ولو يوم واحد بس.. ياااااااه
بجد تسلم ايدك وقلمك.. وكيبوردك

محمد فؤاد (صاحب عمود النور) يقول...

لولا.....

يمكن ساعات الواحد بيبقى فرحان لما يسمع كلام حلو من حد وهو واثق انه مش بيجامله ..بس صدقينى انا لما بقرأ كلامكوا انتى وزهرا بحس باحساس غريب ..وبحس اكتر انى مش قادر اكتب كلام تانى بعد كلامكوا.
ماشاء الله عندك قدرة رهيبه على التحليل والنقد بطريقة علميه وبطريقه واقعيه جدااا .. وبتقدرى تتخللى نسيج الكلام وتوجدى المعانى الدفينه داخل احضان الحروف ودا ان دل على شئ فهو يدل على ناقد واعى وفاهم وعارف ادواته والكلام هقوله لو حتى كنتى بتهجمينى .
على طول انتى او زهراء بتكتبوا كلام فى النقد بتاعكوا ببقى قصده جداااا ومابقاش عارف اذا كان هو طلع فى الابيات ولا لا واحيانا فى ناس مابتبقاش عارفه انا اقصد دا ودا بيدل على النظرة الشموليه للتحليل والنقد
وانتقالك لتحليل الصورة المختارة دا بيؤكد على الوعى التام بادوات الناقد الفنى المحترف (زمان كنت بتابع الناقد السينمائى نادر عدلى واحمد صالح كل يوم اربع فى الاهرام ويمكن دا اللى خلانى اكم عليكوا وابقى واثق انكوا فعلا بتقجموا نقد فنى على مستوى عالى من الفن والدراسه)

اول لما بلمح اسم لولا وزهراء ببقى شايل حمل الكلام اللى هرد عليكوا بيه وببقى مركز فى كل حرف مكتوب
بجد...
احسنتم صنعا ... وانا عارف وواثق ان نقدكم دا مش مجامله وانكم فعلا فاهمين نقد كويس جداااااا

جزاكم الله كل خير

بجد انا مش لاقى كلام تانى اقوله
((((:

محمد فؤاد (صاحب عمود النور) يقول...

قيس بن الملووووح...

نورت المدونه وان شاء الله هدخلك زياره واقرا المشاكل

محمد فؤاد (صاحب عمود النور) يقول...

حلمى البعيد..

انا تمااام الحمد لله
ربنا يعزك
وميرسى على كلامك الجميل دا
امين

محمد فؤاد (صاحب عمود النور) يقول...

ENG./ELSAYED,PMP...

ميرسى يا باشمهندس ودايما منوارنى

محمد فؤاد (صاحب عمود النور) يقول...

سندريلا ....

ميرسى على كلامك الجميل دا ربنا يعزك
دا شرف ليا انك تتابعى المدونه بتاعتى
ميرسى ليكى

Hanan Said يقول...

سعيده بتعرفي على مدونتك الراقيه
بجد مونتك رائعه حسيت فيها انها بتعبر عن كتير جوانا وبكلام بسيط وفي الصميم بجد
سعيده فعلا بوجودي هنا
وفعلا كل ما الواحد بيكبر ويبقى مسئول عن نفسه ويمكن كمان يبقى مسئول عن غيره كمان
بيحس قد ايه الطفوله كنز بجد
وقد ايه يمكن مش كنا بنبقى حسين بقيمه اننا نكون مسئولين من حد دي
ويمكن كمان في ناس بتعتبرها شيء من الخنقه او عدم الحريه
بس بجد دي بتبقى اكبر حريه
سلمت يداك
تحياتي

لــــ زهــــــراء ــــولا يقول...

احسنتم صنعا ... وانا عارف وواثق ان نقدكم دا مش مجامله وانكم فعلا فاهمين نقد كويس جداااااا

جزاكم الله كل خير

بجد انا مش لاقى كلام تانى اقوله
((((:



" ربنا يعزك
ويرفع قدرك
ويعلو من شأنك
ويسعد قلبك

دا كتيير قوي يافندم ربنا يخليكِ
ويبارك في عمرك
هو كلام حضرتك وفنك اللي بيحرك جوانا احساسنا بالمعاني الحلوة
وعلى فكرة متشيلش هم الرد ابداااااا
المشاعر الطيبة بتوصل ولو بكلمات قليلة ..واحنا اللي بنشكرك على الفن مش انت اللي تشكرنا ):):"

لـــولا وزهـــراء

MaNoOoSh يقول...

لو يرجع احساس الانطلاق بلا مسئولية دة
كان الواحد يسوي الهوايل

بس الحمد لله على كل حال

أميرة علي كوكب مهجور يقول...

هاي يا محمد ازيك
يارب تكون بخير
تقريبا الايميلات اللي معايا مش صح
ع العموم التفاصيل كالتالي
مسابقه الساقيه السادسه للقصه القصيرة مايو 2010
يتم استلام الاعمال بدايه من شهر مارس حتي منتصف ابريل 2010
شوف هتعمل ايه وعرفني

Unknown يقول...

محمد
ياريت ترجع دى الايام
بجد كانت اجمل ايام
بس الحلو مش بيدوم

Humman being يقول...

محمد ...أنا أول مرة أدخل عندك... بس واضح انها مش هتكون الأخيرة ..كتاباتك حلوة أوى ...والشعر ده شبه رباعيات صلاح جاهين شوية...هروح أكمل قراءة يقية المدونة
بالتوفيق

Unknown يقول...

جميلة اوى أوى
وربنا ما يحرمك
من الوالد ابداً