الأحد، 28 نوفمبر، 2010

البحث


دور جواك على صورة قديمة

دور يمكن تلاقى تاريخك او حياتك

دور وقولى شوفت ايه؟؟

شوفت ناس ماتوا من زمان

ولا ناس جواك لسه عايشين

ولا حقيقه....

مش لقيها فى البنادمين

دور على صورتك وانت صغير

ودقق قوى فى ملامحك

وقارن... وقولى الفرق

قولى انك اتغيرت من جواك قبل براك

قولى انكسرت ولا لسه على رجلك واقف

بتعاند؟؟

طيب ورينى بتعاند مين؟

ولا فين ولا ليه بتعاند

لسه جوا جيبك صور كتيرة

شوف كدا وقولى

بس ياريت بالحقيقة تقولى

وماتسالنيش عن رأيى

لانه مش هيعجبك

شوف كدا وفرجنى

دلوقتى عمرى قد عمرك

طيب قولى عملت ايه؟

شايفك عمال تدور جوا نفسك

وبتسالها عملت ايه؟؟

مش هجوبك وعايزك

تعر فها لوحدك

طيب اقولك.. قرب من المريا

واسمعها ..هتقولك حكايه

عن واحد كان هنا من كام سنه فاتوا

اقف والمس باديك كل تفصيله فى ملامحك

اقف وافتكر ايام المدرسه وتسريحه شعرك

افتكرت؟؟!!!

خلاص ماتعيطش هسيبك يمكن تقدر تتغير

بس قبل ماسيبك اوعدنى انك هتقدر

ولو اتغيرت

انا مش هخرج تانى ولا هتسمعلى صوووت

وهفضل جواك

بس اوعى تفتكر

ان ضميرك مات

مارس 2008