الاثنين، 29 مارس 2010

الصدفة


الصدفة

عارفها الصدفة؟

فاكراها؟؟

فاكرة اليوم اللى شفتك فيه

وعنيا جت عليكى

ماكنتيش انتى عارفه

كنت بعيد عن مكانك

الصدفه..عارفاهاا؟؟

طب فاكراها؟؟

فاكرة لما كنت معدى قدامك

وحكالك...

الوسيط اللى مابينا عنى

قالك اعرفه بس مش فاكر اسمه ايه؟

سالتيه بتخمن مين؟؟

قالك يا محمد يا حسين

قولتيله قول محمد

نادى على أسمى

بصتلك..

اتكهرب جسمى

وضحكلى وسلم عليا

حضنته وعينك فى عنيا

مهى برضه صدفه

عارفها الصدفه؟؟

حاولت اتكلم معاكى كتير

وخجلى...

خلانى ماتكلمش

بس عارفه...

انا شفتك فى خيالى زمان

ورسمتك صورة بالوان

بس الحق يتقال

فى الحقيقة انتى..

أية فى الجمال

كان نفسى يومها اعترفلك

ماتستغربيش...
اعترفك انى..

بحبك
وكتب ربنا علينا نكون مع بعض
اسعد اتنين على وجه الارض
بس المكتوب هو مكتوب ومعروف
وافترقنا.......

ودلوقتى وبعد سنين

كل يوم مستنى

صدفه اشوفك فيها

وزى مانا عارف

لازم تبقى عارفه

انى فى يوم هشوفك


صدفه
يناير2010
الجزء اللى مكتوب بالاحمر حصل بعد لما كتبت القصيده دى بشهرين او بالظبط من اسبوعين
وكل اللى عملت انى مشيت ومابصتش ورايا وهى برضة كدا اتقابلنا بصينا لبعض وسلام من بعيد وبس

هناك 33 تعليقًا:

Baskouta يقول...

تحفة يا محمد
جميلة وحقيقية
وبتحصل ...بجد بتحصل
اصل الصدفة اوقات بتبقى اقوى من الف الف ميعاد
تحياتي على الصدفة
بسكوتة بالصدفة

محمد فؤاد (صاحب عمود النور) يقول...

ساعات بتبقى صدفة حلوة
وساعات تبقى عادية
وانا بالنسبالى
عادية

صيدلانيه طالعه نازله يقول...

جميله قوى
فيها شقاوه و خفه دم
فيها حب حقيقى و حنان زايد عن الحد

بس الصدف دى هيا اللى بتحلى حياتنا
و بتخليلها طعم و معنى و لون

لــــ زهــــــراء ــــولا يقول...

محمد

---***

كنت منتظره القصيده علشان اشوف الصدفه...
تحفه بجد تسلم الايادى يا فنااااان
لى عوده للنقد طبعا بس بعد شويه ان شاء الله ....

رب صدفه خير من الف ميعاد
ممكن الصدفه تغير حياة انسان للاحسن او لا قدر الله للاسوأ ...
فنان يا محمد


زهراء

Unknown يقول...

طيب ليه بس!

Unknown يقول...

اتكررت الصدفة
ليه ماأستغلتها
وقولت اللى فى قلبك
ولو حتى مجرد تلميحات
ما اصل الصدف الحلوة دى
لا تكرر كثيراً!.

لــــ زهــــــراء ــــولا يقول...

محمد

-*-*-*

رجعت من تانى بعد الغدا بقى علشان نتكلم على بركة الله ...

عنوان البوست شدنى اوى ياترى الصدفه ممكن تعمل ايه ؟؟؟
مش ناويه اعلق على الصوره ..
لانها محتاحجه تحليل جامد اخر حاجه

البدايه حلوه اوى انت كررت كلمة الصدفه بعد ما كتبتها فى العنوان دليل على التأكيد علشان تشد الانتباه

بعد كده انت عاوز بس تتطمن انها عارفه الصدفه وايه هى بالضبط
وكمان تطمن انها فاكره اول صدفه بينكم .....


بتحاول تفكرها باول صدفه جمعتكم وايه اللى حصل فيها بالضبط

بجد يا محمد لاول مره فى حياتى مش عارفه اعمل نقد لشغل بصفه عامه ولك انت بصفه خاصه من كتر جمال المعانى اللى فى الكلام مش عارفه اعلق عليه كل لما اكتب كلمه ارجع امسحها لان جمال وعذوبة الكلام مش عاوزه بعده اى رد غير حاجه واحده بس تصفييييييييييييييييييييييق حاااااااااااااااااد

فيه جمله بس عاوزه اعلق عليها

" حضنته وعينك فى عنيا "

اكيد الحضن ده كانت هى المقصوده به مش هو طبعا ;)


جمله كمان شديت انتباهى

" حاولت اتكلم معاكى كتير

وخجلى...

خلانى ماتكلمش "

خجل ايه بس اللى يمنعك انك تتكلم على فكره الخجل ممكن يضيع حاجات حلوه كتير من حياتنا ....

تسلم الايادى والافكار والصدف السعيده يا فنااااان

زهراء

Remas يقول...

الله يامحمد حلوة اوى بجد

انت عارف انى كنت نفسي اشوفها

حلوة اوى المعانى والاحساسيس فيها

وحلو اوى ان توقعك تحقق والصدفة الاخير فعلا حصلت

دايما بيعجبنى كلامك واحساسك يا محمد

لــــ زهــــــراء ــــولا يقول...

الصدفة
عارفها الصدفة؟
فاكراها؟؟

فاكرة اليوم اللى شفتك فيه

وعنيا جت عليكى

ماكنتيش انتى عارفه

كنت بعيد عن مكانك

الصدفه..عارفاهاا؟؟

طب فاكراها؟؟

فاكرة لما كنت معدى قدامك

وحكالك...

الوسيط اللى مابينا عنى

قالك اعرفه بس مش فاكر اسمه ايه؟

سالتيه بتخمن مين؟؟

قالك يا محمد يا حسين

قولتيله قول محمد


" حست بقلبها انك محمد مش حسين "

نادى على أسمى

بصتلك..

اتكهرب جسمى

" هههه جميلة دي اتكهرب قلبك لما عيونك شافتها
اتبرجل حالك لما قلبك بصلها
اتلخبط كيانك لما عيونك اتلقت بعينها ...
هو انت في يوم بجد بجد فعلاً حبتها !!!"



وضحكلى وسلم عليا
حضنته وعينك فى عنيا


" عينك منزلتش من عليها ..
ياترى من كتر اشتياقك ليها ..
ولا مش مصدق انك واقف معاها
ويتتنفس نفس الهوا اللي حوليها ...
و مش عايز لحظة عينك تغفل عنها فيها "

مهى برضه صدفه
عارفها الصدفه؟؟

" انت مش بتسألها انت بس بتخبرها عن اللي عملته فيك الصدفة ..جواك كلام عايز توصلهولها من ورا السؤال ..انت مش مستني تسمع اجابتها عن معنى الصدفة ...انت مستني تخبرها باللي جواك خبتهولها ..وبقلبك هتسمعهولها ..بس اشك ان لسانك قالهولها ...انت اكتفيت بالصمت بس وبعينيك ترسمهولها ... وخجلك منعك من انك عنه تعبرهولها ... وبعد ما مشيت اتجرأت وجيت هنا تقولهونا ..."
حاولت اتكلم معاكى كتير
وخجلى...
خلانى ماتكلمش
بس عارفه...
انا شفتك فى خيالى زمان
ورسمتك صورة بالوان
بس الحق يتقال
فى الحقيقة انتى..
أية فى الجمال

" هو ده اللي شدك ليها
هو ده اللي لفت نظرك فيها
آية م الجمال طب الروح مبصتش عليها 8-> :d!!!
"
حلو انك في عقلك رسمتها
وف خيالك لونتها
وجوا قلبك الصورة حفظتها ..
بس برضه مهما انت رسمتها
هي احلى من اي وصف بيه انت وصفتها..
برافووووو يافؤاد =D>=D>=D>"

كان نفسى يومها اعترفلك
ماتستغربيش...
اعترفلك انى..
بحبك

" 8->;;)8->;;)..هههه وطبعاً انت معترفتلهاش انت بتبلغنا احنا هههههه
ياعمنا روح قولهاااااااااااااا ولا اللي واقف معاها دخل حياتها قبل ما تعترفلها؟
"
ودلوقتى وبعد سنين
كل يوم مستنى

" وصلتلنا استمرارية تعلقك بحلم مقابلتها من جديد... ومدى اشتياقك وصلتهنا من كلمة كل يوم ..طب ياعمنا مافيش يوم و يوم لازم كل يوم يعني 8->;;)8->;;)"

صدفه اشوفك فيها

وزى مانا عارف

لازم تبقى عارفه

انى فى يوم هشوفك

صدفه
يناير2010
" فكرتني بصدفة عبد الحليم :d :d :dفي آخر كدبة ...حلووووة قووووووي وعلى فكرة فاطمة سمعتهالي بصوتها خطييييييييييرة وعايشتني في جو جميييييييييييييل مع اشعارك وخواطرك ... لازم تسمعها منها ..جميييييل يافنان =D>=D>=D>"
عرفت اسلوبي ولا محتاجة اقول

لـــولا

sony2000 يقول...

ياعييييييييني
طب ياعم لاقلت بسست ولا حاجه
تمشي علطول كدا:)
ماشي مااااااااااشي
دي ايه الناس للي بتمشي من غير ماترمي السلام حتي
هههه
بس بجد بوست رائع كالعاده

ستيتة يقول...

رب صدفة خير من عشرة كيلو سمك وجمبري

طب وقع الموبيل بتاعك زي احمد حلمي
تناولك الموبيل وقع اللاب توب وقول لها مخدتيش بالك من النضارة :)
اتصرف
لا اله الا الله
مضطرين نستنى كمان شهرين تانين
على ما تشوفها صدفة وتطبق النظرية :)
ربنا يسعدك
حلوة قوي
بحب المشاعر الراقية
ولما يعبر عنها فنان
بيعبر حلو جداااااااااااااااا

ghada mOhsen يقول...

ياسيدي على الصدفه :) ...

بجد أجمل الحاجات إللي حصلت معايا كانت بالصدفه ...

الصدفه بيبقى ليها طعم غير بجد ...

وإسلوبك كتير حلو وبجد خفيف وسلس ..

تسلم هالأيادي إن شاء الله ...

... ;) ,,, ;) ...

محمد فؤاد (صاحب عمود النور) يقول...

صيدلانيه طالعه نازله..

ازيك يا دكتورة عامله ايه يارب تكونى بخير

ساعات الصدفة بتبقى حاجه انتى مستنيها وحلوة
وساعات مابتبقاش صدفة حلوة

بس ساعتها قرارك بيبقى فى اقل من الثانية هتمشى ولا لا..

محمد فؤاد (صاحب عمود النور) يقول...

norahaty...

انا ضفت جزء فى القصيده عشان هى اتفهمت غلط
اللى بتكلم عنها دى احنا كنا مع بعض مرتبطين

محمد فؤاد (صاحب عمود النور) يقول...

زهراء....

هم كبيييييييييير جداااااا ببقى شايله وانا بشوف ردك عندى ع المدونة لانى ببقى عاجز عن الرد وان مافيش اى كلام يتقال بعد كلامك
ميرسى ليكى جدااااااااا وعلى فكرة واللهى الكلام بطلع منى كدا ومش برتبه خالص

محمد فؤاد (صاحب عمود النور) يقول...

reem....

ميرسى ياريم على كلامك الجميل ورايك اللى بيدينى دايما دافعه انى اكتب كتير

جزاكى الله خيرا

محمد فؤاد (صاحب عمود النور) يقول...

لولا...

مش عارف ارد على تعليقك
بجد مش لاقى كلام يتكتب
بس ياريت تقرى الجزء الجديد اللى انا ضيفته للقصيده

يمكن المعنى يختلف تماااااماااا

بجد وجودك فى التعليقات دايما دايما وجود حماسى ليا

محمد فؤاد (صاحب عمود النور) يقول...

sony2000...
اللى حصل بقى ماتلمنيش هههههههههههههه
ميرسيى على كلامك الجميل

محمد فؤاد (صاحب عمود النور) يقول...

ستيتة حسب الله الحمش...

هههههههههههههههههههههههههه تصدقى انا بعشق الجمبرى بس اكيد الصدفة مش احلى منه

ميرسى يا دكتورة على كلامك الجميل ودايما منورانى

بس انا مش معايا لاب توب !!!!!!!

Unknown يقول...

قلتلى بقى ....
كنتم مرتبطين !!
ياخبر !معلش
خيرها فى غيرها
ويعوض عليكما
بالخير يـــــارب

محمد فؤاد (صاحب عمود النور) يقول...

ghada mOhsen

ميرسى يا غاده على كلامك وتعليقك

مجرد حلم صغنتوت يقول...

حلوة اوي يا محمد
بس ليه الاكتئاب ده :S

حلمى البعيد يقول...

السلام عليكم

يسلم أفكرك وإحساسك

أكيد الصدفه بتبقي ليها إحساس وفرحه تانيه غير الميعاد

ده لإنها بتبقي غير متوقعه

وخاصه لو كانت لشخص عزيز علينا

بارك الله فيك

موناليزا يقول...

وإحساسك لما شوقتها كان زى ما كنت متوقع؟

أميرة علي كوكب مهجور يقول...

ساعات بنتمني الصدفه ولما تحصل نقول ياريتنا ما اتمنينا :(

انت فنان يامحمد بجد

محمد فؤاد (صاحب عمود النور) يقول...

norahaty...

شوفتى بقى؟؟
الحمد لله على كل شئ وربنا بيعوض خيرا طبعا

ـــــــــــــــــــــــــــــــــــ
مجرد حلم صغنتوت...

ميرسى قووووى
بس دا مش أكتأب دا واقع حصل

غير معرف يقول...

جميلة اوووى

احلى انواع الصدف اللى بتخلينا نقابل ناس نفسنا نشوفها

SHAPE YOUR LIFE (ABOALI) يقول...

صدفة
الصدف فى البحر يعنى بتلاقى فى طريقك سمك كتير
بورى وبياض موسى ومايمنعش يكون بلطى
بس الصدفة فى البحر يعنى
بتكون مستنية حد تانى بس مش السمك
لكى تفتح نوافذ حياتها وتستشنق عبير تعيد به بهجتها من جديد لانها تعرف انها صدفة فى الحياة يعنى

وتكرارها فى علم صاحب الغيب


جميل ومميز ما كتبت يا محمد
وبلاش تعمل كده تانى

صباح الخير يقول...

جميله جدا يا أبو حميد (أن سمحت لىّ)
تعبيرك عن تجربتك الشعورية رائع مليان حيويه وخفة دم ..
تحياتى وتمنياتى القلبيه لك بدوام التوفيق

hend mossallam يقول...

la2 bgd teganen :D

shimaa saied يقول...

بجد جميلة جدا جدا وتحفة وتحس ان كلامها خارج من قلبك بس انت غلطان كان لازم تستغل الصدفة دى عشان مش بتتكرر كتير ولا انت اية رايك

محمد فؤاد (صاحب عمود النور) يقول...

star in the sky...

فعلا بس ساعات بيجوا فى وقت مش وقتهم خالص

محمد فؤاد (صاحب عمود النور) يقول...

shimaa saied....

ربنا يخليكى على كلامك الجميل
الفرصة لما تكون فى وقتها يبقى لازم استغلها
لكن هى جت فى وقت مش وقتها وانا كنت خلاص قفلت الصفحة دى لان انا دلوقتى مش محتجلها
(: