الاثنين، 10 مايو 2010

ومازال البحث

أوقات بحتاج الهروب
من باب واسع كبير
او من خرم ابره ممكن
وبتضيع اوقات كتير
قدام بيبان متقفله
بسالك..
بقالى كام سنه
بين الورقة والقلم حيران
مهو باب من البيبان
ممكن اطير بين السطور وافكر
ويمكن اطير بين الحروف واعبر
او يمكن استنى نزول دموعى
حتى دى ولا عليها بقدر
انا يمكن فرحتى وضحكتى هم سر وجودى
بس فى سر اكبر
ومازال البحث جارى
أبريل 2010

هناك 24 تعليقًا:

لــــ زهــــــراء ــــولا يقول...

مـــحمـــد

-*-*-*-*-*-

ما زال البحث جارى عن :
كل ما هو جميل
امل نسعى الى تحقيقه فى غد مشرق
ضحكه قد تأتى من بين الدموع
فرحه أكيده قد يحملها الغد
باب يتم فتحه بعد ما عجزنا عن فتحه

ومازال البحث جارى عن الامان والحب والخير والخلان " جمع خليل يعنى صديق "

لى عوده مره اخرى ان شاء الله

زهـــراء

صيدلانيه طالعه نازله يقول...

الله عليك

كلنا ساعات بنحتاج الهروب من كل ما هو موجود

ساعات بتبقى الدموع فعلا احسن طبيب لانها بتغسلنا من همومنا

مازال البحث جارى عن الحب و النقاءو الاخلاص

لو لقيتهم ياريت تقوللى لقيتهم فين


تحياتى

Ramy يقول...

محمد

اولا الكلام جميل جدا جدا

ثانيا الهروب

كلمة اعتقد ان احنا بلنجأ ليها احيانا

انا كنت بلجأ ليها كتير

بس حاليا بحاول أواجة أكتر

ثالثا انا كنت معتقد كدة برضة ان

فرحتى وضحكتى هم سر وجودى

بس السر الأعظم هو ربنا

لما تقعد مع نفسك

هتلاقى برغم همومك

بعتلك اللى يصبرك

صدقنى بأمانة انا مش بتفلسف

او بوعظ لأن انا اصغر من كدة

انا بقولك عن تجربة شخصية

هو بعتلى اللى يساعدنى

تصدق ربنا بعتلى القصدية دى

علشان يفكرنى برضة

ربنا يوفقك

شكرا

Baskouta يقول...

جميلة اوي يا محمد
ومعبرة جدا
فعلا اوقات بنتمنى ولو خرم ابرة نخرج منه لدنيا غير الدنيا واوقات تانية ولا براح الكون بيساعنا
جميلة المعانى
وسر وجودك يا محمد هو احساسك
ربنا يديم عليك الاحساس الحلة ويبعد عنك اي احاسيس ممكن تضايقك
تحياتي

حلمى البعيد يقول...

جميل أوى يا محمد
كل بوستاتك حلوه أوى
ربنا يحفظك ويخليك
تحياتى لشخصك الرائع

أحمد عبد الحميد يقول...

حقول كلمة واحدة بس:
باااااااشا

أحمد عبد الحميد يقول...

حقول كلمة واحدة بس:
باااااااشا

دندنة قيثارة الوجد يقول...

بين الورقة والقلم وجدت ذاتي عندما إنسال مدادي الفكري وتوقف البحث عن الجري ولله الحمد.

Unknown يقول...

كل هذا له حل واحد وهو الحب وطول ما انت بتدور عليه مش هتشوفه

SHAPE YOUR LIFE (ABOALI) يقول...

وما زال البحث جارى ..ولكن متى سنقول اننا بالفعل وجدنا ما نبحث عنه ؟
متى سنقر اننا اصبحنا على يقين تام من سر وجودنا وبقاؤنا ؟اعتقد اننا اصبحنا نهرب حتى من انفسنا وصرنا تائهين فى مكان نعرفه حق المعرفه ..هذا المكان نحتاج ان نبحث فيه قبل اى شىء اخر نبحث فى داخلنا من قبل ان نبحث فيما وفيمن حولنا واكيد سنتوصل الى اسرار واسرار من اسرار وجودنا .

رائع بجد يا محمد ما كتبت فلديك اسلوب سهل ممتنع يحمل معانى عميقه رغم بساطه وجمال الاسلوب .

وكلنا مازلنا نبحث معك

ستيتة يقول...

الله
انت لم تعبر عن نفسك وحدك
انت عبرت عن ناس كتير وانا منهم
والله يا محمد من النعم ان ربنا يدي واحد القدرة والأحساس انه يعبر عن ناس كتير حتى لو مكنش عارف

تحياتي

لــــ زهــــــراء ــــولا يقول...

محمد

-*-*-*

رجعت من تانى
اول ما قرات البوست تذكرت رباعيه لصلاح جاهين كان بيقول فيها ...

يا باب يا مقفول.. امتى الدخول
صبرت ياما واللى يصبر ينول
دقيت سنين .. والرد يرجع لى :مين؟
لو كنت عارف مين انا كنت اقول

------------

لما الواحد يبقى عاوز يهرب ممكن يقول عاوز اهرب من جلدى ....




"انا يمكن فرحتى وضحكتى هم سر وجودى "

هم سر وجود ناس كتير بس لما تكون الفرحه والضحكه من القلب بتكون اجمل واحلى مش مجرد ملامح فقط مرسومه على الوجه ....


"بس فى سر اكبر
ومازال البحث جارى "


كل فرد منا يحاول ان يبحث عن هذا السر الذى ربما هو سر حياتنا
عن نفسى ابحث عن :
*الحب فى قلوب البشر
*السعاده التى ربما يحملها لى الغد
* احلامى التى قد تبدو فى بعض الاحيان بعيده
*احبائى الذين قد تكون شغلتهم ظروفهم

بوست اكتر من رائع رغم ما تحمله حروفه وبين سطوره لكن تحفه بجد

لا تعليق على ما بين السطووووووور

زهراء

ghada mOhsen يقول...

هلا محمد ...

الحاله دي أنا فيها بقالي إسبوعين كده .. حالة الهروب ..

ده أنا حتى بقيت بهرب من إللي كانوا ملجأي الوحيد الورقه والقلم ...

بس دي بتبقى فتره وتعدي إن شاء الله ..

بس بجد ماشاء الله عليك .. إسلوبك كتير راقي ..

ربنا يسعدك
... ;) ,,, ;) ...

Remas يقول...

الله يا محمد عليك

بجد انت فعلا وصفت حالة بتحصلى واكيد بتحصل لكتير اوى من الناس

حلو اوى تعبيرك انك بتطير بين الحروف وبتتجول بين السطور

دايما بتعرف توصلنا الاحساس صح وبتوصلنا لاحساسنا احنا كمان اللى بنكون حاسينه بس مش عارفين نوصفه

وبردو مازال البحث جارى

Unknown يقول...

bos ya mohamed mel a7'er keda dy mn a7la el hagat el aretha f 7ayaty
wenta 3aref eny 3'awya eraya w ba2ra keteer

bgad rabeina yewafa2ak

Unknown يقول...

mel a7'er keda ya mohamed da mn a7la el hagat el aretha f 7ayaty
wenta 3aref eny 3'awya eraya w ba2ra keteer

bgad rabeina yewaffa2ak

kowayes eny a7'eeran la2et wa2t a2rah ennaharda, lahsan kan hayfotny keteer

ليله شتاء يقول...

السلام عليكم
القلم والورقة أوفى الاصدقاء

*****
نحن من نصنع ألامنا وأفرحنا
ربما للبحث عن مخرج كما سرد بكلماتك وربما للهروب

دام قلمك

محمد عبدالرحمن شحاته يقول...

احسنت يامحمد

الى الامام دائماً

لــــ زهــــــراء ــــولا يقول...

مممكن ابدأ بالصوره ...
تعرف ان الشئ ممكن يكون هو هو

بس عين كل واحد فينا بتشوفه بعينه هو

ان كان جواه حزين بيشوف بعين الحزن

وان كان نشوان بيشوف الفرح جوة

* الزاوية اللي الكاميرا واخده الباب منها بتقول ان صاحبها شايف سد طووووووووووووويل من باب مالوش اول من اخر .
في لغة السينمائيين لما المخرج يحب يعظم حد يجيبه من تحت لفوق ببطء بالكاميرا والعكس ان عاوز يحكره
او مشمئز منه..
الباب الكاميرا بتحكره
لكنها متقدرش تنكر طوله ولا تقصره..
.باب طويل عريض مقفول قدامك سادد عليك كل شئ حابة ايدك توصله

ترباسة لاتعرف منه مقفول عليه ولا تقد تكسره
باب عريض مفتاحه فيه
لكنك رغم دا كله ماتعرف تفتح بيه بابه وتدخله
بابه خشب بقيود حديد عمرك ما تعرف عندها للامل توصله



أوقات بحتاج الهروب
من باب واسع كبير

" نأسف لتعذر تلبية حلمك "

او من خرم ابره ممكن

" تعرف الكلمة دي فكرتني بقول الله تعالى
بسم الله الرحمن الرحيم "ولايدخلون الجنة حتى يلج الجمل في سم الخياط"
مستحيل تحقيق حلمهم لاستحالة تنفيذ ه ...ياااااااه..بعد الشر عليك بس بقول استحالة لاستحالة "


وبتضيع اوقات كتير
قدام بيبان متقفله

" ممكن تبقى ابواب متقفلة ... كل ما واحد يطرق باب يقف امامه منتظر دون جدوى ..وضاع حلم تلو اخر تلو اخر

وبقت ابواب امل موصودة
ودنيا النجاة وراها مفروشة
مش عارف اهرب مني اروح لفين
والخطوة عليا محسوبة ومعدودة"



بسالك..

" بتسألك انت ...
فكرتني بفيلم في محطة مصر لما البطل اتقسم اتنين
واحد بيسأله والتاني يبررله ..
واحد بيحاول يرسمله الامل
والتاني بالممحاة للطريق بيمسحله...
واحد بيصارع عشان يعيش والتاني للامل ناوي على قتله...
ممتاز يا فؤاد تعرف ان الشعراء القدامى في معظم اشعرهم بيتخيلوا وجود صديقين معاهم ويبدوأ يحدثوهم زي

اذكرا لي الصبا وايام انسي... وسلا مصر هل سلا القلب عنها أو أسا جرحها الزمان المؤسي
انت نجحت ولخبطنا محناش عارفين تقصد حد معاك ولا تقصدك انت ولا تقصد مين جميييييييل "



بقالى كام سنه
بين الورقة والقلم حيران
مهو باب من البيبان

" على فكرة حلوة انك استخدمت في الاول بيبان كويس انك مسمعتش كلامي :d لان البيت هنا محتاج لها
وكان هيحصل خلل ان كنت قولة ابواب ورجعت قولت بيبان ..برافوووووووووووووووووو"



ممكن اطير بين السطور وافكر
ويمكن اطير بين الحروف واعبر
او يمكن استنى نزول دموعى
حتى دى ولا عليها بقدر

" ياسلاااااااام وانا لما اقول ياسلام مقدرش اوصف جمال الكلام وربنا تحفة ... :-$ :-$ :-$"

انا يمكن فرحتى وضحكتى هم سر وجودى
بس فى سر اكبر
ومازال البحث جاري
" =D>=D>=D> على فكرة يانور انت من الناس اللي تدون سطرين تبقى صلاح جاهين الجديد
وسطرينك بمقام مقالين ودي العبقرية يانور
ولما تدون صفحة او اتنين بنكتشف انك بتعمل رباعيتين او اكتر تحت عنوان واحد مندمجين ...وبرضه بشوف فيك لسة صلاح جاهين...حتى وان دونت من الرباعيات تحت بعض عشرين"

هو انا لازم امضي ولا عرفت انا مين

لـــولا

د. ياسر عمر عبد الفتاح يقول...

مازال البحث جاري

الجملة دي لخصت كل حاجة
جميل يا محمد
تسلم إيديك

Khaled يقول...

حلوه يا فؤش
تقبل مروري
خالد

غير معرف يقول...

ابدى كل اعجابى لما احسسته بين هذه السطور
تحياتى

ساسو يقول...

الله يا محمد
كلماتك نابعه من القلب
واحساسك جميل جدا
ومدونتك بجد هايله

مستنياك تنور مدونتي المتواضعه جدا

بنت وولد يقول...

احلى ما فى كلامك
اننا بنحتاج نفكر فيه
كتير عشان نفهمه
و دى فى حد ذاتها ميزه

كلامك حلو قوى
تسلم ايدك