الجمعة، 26 فبراير 2010

أستغفار


أستغفرت ربى رب السموات والارض


وقولت هابعد عن ذنوبى بالطول والعرض


صليت كتير ودعيت من كل قلبى


انا وراك ياشيطان لاحد ماحيلك يتهد

اعتزار لابد منه:
انا اسف جدااا يا جماعة انى ماكنتش برد على تعليقاتكم البوست اللى فات كان عندى ظروف فى الشغل فاكنت مشغووول جداا

السبت، 20 فبراير 2010

الباب الزجاجى


نهض هذا اليوم من سريرة ونظر من الشرفه على الشارع الذى يسكن فيه وتذكر ايام الطفولة واللعب مع اصدقائه الذين تفرقوا منذ زمن طويل ...
ذهب الى المطبخ واعد وجبه افطار واستعد ليوم شاق وطويل يبدا من الساعة الثامنة ,عليه الوصول الى العمل فى وقته لانه لايحتاج ان يخصم من مرتبك شيئا لانه قليل.
استقل الميكروباص الاجرة الذى يذهب بيه الى اقرب محطه مترو وصعد سلم المترو بعد ان اشترى تذكرة .. فى اثناء صعوده الى الرصيف من خلال السلم الكهربائى كان قطار المترو يهم بالذهاب من المحطه ونظر اليه وهنا التقطت عيناه بيها وهى داخل العربه ووجها اليه من خلال الباب الزجاجى نظرة اليه ونظر اليها ومر القطار والعربه ثم جلس على احدى مقاعد الرصيف واخذ يفكر هل هى؟؟

الاثنين، 15 فبراير 2010

الجبل


ياااه لو يرجع بيا الزمن وياخدنى ابويا فى حضنه


أضحك وأبكى أفرح وأجرى ولحضنى اضمه


ولا حس بالجبل اللى فوق كتافى حمله زايد


ولا ييجى عليا اليوم وأفكر فى بكرا وهمه

الخميس، 11 فبراير 2010

شخصية



انا وقت وعدى بسرعه

انا ساعه فوق الحيطة

انا دقة قلب فى قلبك

انا صرخه فى وسط الظيطه

انا سقفه جوه المسرح

او ضحكة قلب عميقه

انا دمعه طفل صغير

انا واحد عمره قصير
من ديوان (سجارة فرط) قريبا

السبت، 6 فبراير 2010

سكــــين


سكين الغدر ضربنى فى ضهري قسمنى اتنين


وقفت لوحدى فى عرض طريق اقول انا فين


مالقيت لا صديق ولا قريب ولا حبيب


بأديه يشيل الدمع مغرق سايل ع الخدين

الاثنين، 1 فبراير 2010

متاهه


حوارى وبيوت وشوارع ومتاهة


واشخاص ووشوش فى السكة تلقاها


عايش موجود مبسوط وحزين.


دانا اللى جوا منى كل دا وزيادة